काठमाडौं — यस वर्ष दसैं–तिहारका लागि नयाँ नोट साट्न विगतमा जस्तो निश्चित मिति कुर्नुपर्ने व्यवस्था गरिएको छैन। सर्वसाधारणले आफूलाई पायक पर्ने बैंक तथा वित्तीय संस्थाका शाखाबाट आवश्यकता अनुसार नयाँ वा सुकिला नोट साट्न सक्ने व्यवस्था गरिएको छ।
नेपाल राष्ट्र बैंकका अनुसार नयाँ नोटको मौज्दात पर्याप्त रहेकाले बैंक तथा वित्तीय संस्थामार्फत आवश्यकता अनुसार सटही सुविधा उपलब्ध गराइनेछ। राष्ट्र बैंकको थापाथलीस्थित कार्यालयबाट पनि नोट साट्न सकिनेछ।
यस वर्ष दसैंमा साना दरका नोटको माग व्यवस्थापन गर्न रु. १०० दरका नोट एटीएमबाट समेत निकाल्न सकिने व्यवस्था गरिएको जानकारी सार्वजनिक भएको छ। यसले दसैंमा नयाँ तथा सुकिला नोट लिन बैंकमा लाग्ने भीड केही व्यवस्थापन गर्न सहयोग पुग्ने अपेक्षा गरिएको छ।
दसैंमा नयाँ नोट साट्ने चलन नेपालमा लामो समयदेखि चलिआएको छ। राष्ट्र बैंकले पछिल्ला वर्षमा नयाँ नोटसँगै सुकिला नोटको प्रयोगलाई पनि प्राथमिकता दिँदै आएको छ।
ओखलढुङ्गा पोस्ट
प्रकाशन मिति: २०८३ असोज १५
Leave a Reply