ओखलढुङ्गा। सिद्धिचरण नगरपालिका–७, बिगुटारमा सडक स्तरोन्नति हुने भएको छ। नगरपालिकाले बिगुटार छिर्ने घुन्सा गेटदेखि वडा नं. ७ को वडा कार्यालयसम्म जाने सडक स्तरोन्नतिका लागि ठेक्का आह्वान गरेको छ।
वडाध्यक्ष भलबहादुर कटवालका अनुसार करिब ८० लाख रुपैयाँको बजेटमा घुन्सा गेटदेखि अगाडि सडक स्तरोन्नतिको काम अघि बढाउन लागिएको हो। सडकमा करिब ७ मिटरको पक्की नालीसहित सडक स्तरोन्नति गर्ने योजना रहेको वडाध्यक्ष कटवालले जानकारी दिएका छन्।
सिद्धिचरण नगरपालिकाले २०८३ असोज ९ गते (२५ सेप्टेम्बर २०२६) ठेक्का आह्वानसम्बन्धी सूचना प्रकाशित गरेको हो। सूचनाअनुसार उक्त सडक स्तरोन्नति कार्यका लागि अनुमानित लागत ७० लाख ९२ हजार २०५ रुपैयाँ ४७ पैसा रहेको छ। उक्त रकममा मूल्य अभिवृद्धि कर (VAT) र कन्टिन्जेन्सी समावेश छैन भने PS समावेश गरिएको छ।
ठेक्का प्रक्रियामा सहभागी हुन चाहने योग्य नेपाली निर्माण व्यवसायीले २०८३ असोज २९ गते (१५ अक्टोबर २०२६) सम्म कार्यालय समयमा सिद्धिचरण नगरपालिकाको कार्यालयबाट बोलपत्रसम्बन्धी कागजात खरिद गर्न सक्नेछन्। बोलपत्र कागजातका लागि ३ हजार रुपैयाँ दस्तुर तोकिएको छ।
बोलपत्र २०८३ असोज ३० गते (१६ अक्टोबर २०२६) दिउँसो १२ बजेसम्म सिद्धिचरण नगरपालिकाको कार्यालयमा बुझाइसक्नुपर्नेछ। प्राप्त बोलपत्र सोही दिन दिउँसो १ बजे खोलिने नगरपालिकाले जनाएको छ।
वडाध्यक्ष कटवालले सडक स्तरोन्नतिको ठेक्का प्रक्रिया अघि बढेको जानकारी दिँदै बिगुटारवासीका लागि सडक पूर्वाधार सुधारको काम अगाडि बढ्न लागेको बताएका छन्।
Leave a Reply